- أنا عارف الحساسية تجاه أمريكا و سنين أمريكا و سياسات أمريكا فى الشرق الأوسط. معظم الناس ينظروا إلى أمريكا على أنها عدو و على إنها بتخطط لتقسيم العالم العربى ووو إلى اخر الكلام اللى كلنا عارفينه. فى ناس تانية شايفين انها بلد الحضارة و الفرص و الحرية و الديموقراطية. أنا بقى شايفها حاجة تالتة خالص. على فكرة ده مش من باب خالف تعرف "أبسلوتلى نوت على رأى اللمبى" انا شايفها على انها بلد بتحترم شعبها و ممكن تعمل اى حاجه علشان تحافظ على مستوى رفاهية شعبها. بلد تحكمها المصالح البحته, يعنى لو مصلحتها مع إسرائيل ممكن تحارب كوكب الأرض كله و ماحوله من كواكب علشان يحافظ على إسرائيل و لو مصلحته مع بلاد تركب الأفيال هاتلاقى الشعب الأمريكى كله بيركب الأفيال علشان يرضى عنه راكبى الأفيال!!
- أنا هنا هاحاول انقل لكم تجربة عشتها بنفسى ماحدش حكالى عليها. سنه و نص تقريبا قضيتها فى أمريكا, كانت تجربة ثرية على كل الأصعدة. من اهم ما يميز أمريكا كبلد من وجهة نظرى هو التنوع الثقافى فى البلد, يعنى ايه, يعنى انت هاتقابل كوكتيل من البشر و على كل لون يا بتسطة. هاتلاقى الأفارقة و الأسيويين و العرب و المسلمين و اليهود و الملحديين و اى صنف من البشر. أنا ازعم إنى قابلت بشر من كل أقطار الأرض فى الفترة اللى قضيتها فى أمريكا. كل واحد جاى من بلد وراه حكاوى ما بتخلصش و عادات و تقاليد جميلة و غريبة تخليك تقول من كل قلبك سبحانك يا رب على عظيم خلقك, و صدق الله العظيم حينما قال "يَا أَيُّهَا النَّاسُ إِنَّا خَلَقْنَاكُمْ مِنْ ذَكَرٍ وَأُنثَى وَجَعَلْنَاكُمْ شُعُوباً وَقَبَائِلَ لِتَعَارَفُوا إِنَّ أَكْرَمَكُمْ عِنْدَ اللَّهِ أَتْقَاكُمْ إِنَّ اللَّهَ عَلِيمٌ خَبِيرٌ " [الحجرات:13]
فى القسم ده هاحكيلكوا عن تجربتى فى بلاد العم سام و حكايات كتيرة و صور أتمنى انها تنفعكم إن شاء الله
فعلاً اللى قال إن فى السفر سبع فوايد غلط ... اه غلط... لأن السفر ده مش فيه سبع فوايد بس لأ ده كله فوايد
ليست هناك تعليقات:
إرسال تعليق